اے ملکہ کائنات بی بیؐ اے رحمتِ عالمین بی بیؐ

-

 بسم اللہ الرحمٰن الرحیم


 دعائے توسل

(توسل بہ ملکہئ دوراں) 

صلوات اللہ علیھا


اے ملکہ کائنات بی بیؐ اے رحمتِ عالمین بی بیؐ 

اے نورِ وحدت دے یکتا گوہر دی مثل وحدت امین بی بیؐ

نیابتِ سیدہؐ ءِ عالم دی پاک مسند نشین بی بیؐ

کرم تے شفقت عطا دے اندر مزاج ربِ زمین بی بیؐ

کریمؐ بچڑےؐ دی پاک امڑی پنن دا آیاں میں جوڑ حیلہ

 میں اج تہاڈے لختِ دل کوں پننائے تساں بنڑو اج میڈا وسیلہ 



ساڈا نہیں کوئی بیا وسیلہ پھریند نہیں کوئی دعا توں ودھ کے 

تہاڈی گولی ہے اُول اساں نہیں در کوئی بابِ عطا توں ودھ کے 

تہاڈا لختِ جگر کریم ہے قسم خدا دی خدا توں ودھ کے 

نہیں ہج کہیں دی وی ڈھیر لگدی جہاں تے پتراں تے ما توں ودھ کے 

ہمیشہ دلبر سلامت ہووی اساں نہیں خالی ایں در توں ولناں 

اے سینؐ ساڈی ہے محض عرضی اگوں تہاڈا ہے حکم چلناں 


سہاگ دا چھتر سر تے ہووی سہاگ دی چھاں کڈاہیں نہ ڈھلے 

ہمیشہ جھولی دا مان راہوی ایں پاک ممتا دی چھاں دے تلے 

اساں خطا کار ہیں ازل دے نہیں کوئی چنگائی اساڈے پلے 

مگر ہے اے وی محال ڈسدا سوالی خالی ایں در توں ولے 

تساں بنڑو اج وکیل ساڈے کرو اساڈی تساں وکالت 

اساکوں مقصد دی بھیک پاؤ چا منگتیاں تے وساؤ رحمت 


اساڈے ہتھ نہیں دعا دے قابل اساڈے لفظاں دی جان کوئے نہیں 

زباں دی حرکت بیاں دی شوکت تہاڈے شایانِ شان کوئے نہیں 

ہے فکر آلودہ معصیت توں تے شستہ وہم و گمان کوئے نہیں 

ہے دل اتے ذہن کند اساڈا دلاں دا وی راز دان کوئی نہیں 

ہزاراں مجبوریاں اساکوں چا پائیاں ہن نک دے وِچ مہاراں 

 پنن سوا کوئی وی چارہ کوئی نہیں پر اپنی کیتی تے شرمساراں 

 

کرم دی ملکہؐ عطا دی دیویؐ اے رحمتاں دی وقار بی بیؐ

تہاڈی آ عام شام تھئے ہیں اے عظمتِ کردگار بی بیؐ

جنہاں دا کوئے نہیں انہاں دے کیتے کرم دی پروردگار بی بیؐ

تہاڈا ہر توں ہے ودھ مہابہ اے پاک گھر دی بہار بی بیؐ

توں پاک بچڑے تے زور ڈے کے اساڈی عرضی ہنڑیں منا ڈے 

توں پاک ویڑھے دیاں ابدی خوشیاں ایں لختِ دل توں ساکوں گھنا ڈے 


ہے غیبت اِچ تیڈا لعلؐ روندا قسم خدا دی اساڈا وس نہیں 

ہے ڈاڈھی غربت دے نال روندا قسم خدا دی اساڈا وس نہیں 

ہے رات ڈینہ لاجپال روندا قسم خدا دی اساڈا وس نہیں 

ہے بنڑ سراپا سوال روندا قسم خدا دی اساڈا وس نہیں 

توں ساکوں اے اختیار گھن ڈے جو ساڈے وس اوندی ہر خوشی ہو 

ہمیشہ کھلسی اے لعلؐ تیڈا توڑے ساڈی خرچ زندگی ہو 


اساکوں جے اختیار ہوندا نہ ڈکھ ایں گھر دے قریب آندے

معظمہ بی بیؐ دے لعل سارے ہمیشہ کھلدے تے مسکراندے

نہ سنڑدی دنیا خموش تھی کے اے وین مظلومؐ دیاں دھیاں دے

تے حوصلے نہ جوان تھیندے تہاڈے بد بخت دشمناں دے 

تہاڈے ایں سوہنڑیں ماہ لقا دا ہمیشہ دنیا تے راج ہوندا

تمام آلِ نبیؐ دیاں خوشیاں دا انہاں دے سر تے تاج ہوندا


تساں بنڑو ہنڑ ساڈا وسیلہ اساڈی پوری مراد ہووے 

تہاڈا مونجھا اداس گلشن بہاراں جھل کے اباد ہووے

تے ہر کلی گل گلاب غنچہ خوشی دی ٹنگریں تے شاد ہووے

خوشی دی ایسی آ ہیل گھلے جو ڈکھ نہ ول کہیں کوں یاد ہووے

مراد  جعفرؐ   دی   پوری   ہووے   اساڈے   کجھ   حوصلے   بدھیجن

تے شکر دے آ کے لکھاں سجدے تہاڈی نعلین کوں کریجن


Comments

Post a Comment

Popular posts from this blog

شبیرؐ تیڈی بھینؐ کوں وسدا چمن بھلناں تاں نہیں

-
Image
 یا مولا کریمؐ (نوحہ پاک) {1764} شبیرؐ تیڈی بھینؐ کوں وسدا چمن بھلناں تاں نہیں  ڈُکھاں دے گرہن وِچ میکوں چوڈی دا چن بھلناں تاں نہیں  ……٭…… لکھ وار بخت اقبال دی ڈیکھاں میں تیڈے سر تے چھاں  بیٹھا سنہری تخت تے ڈیکھاں تیکوں میں جانِ جاں  پر تیڈا بلدی ریت تے زخمی بدن بھلناں تاں نہیں  ……٭…… سر تے سنہری تاج ہو فردوس دی پوشاک ہو شاہی رعایا راج ہو طرہ سرِ افلاک ہو پر بھین کوں ایں خاک دا میلا کفن بھلناں تاں نہیں  ……٭…… اے ٹھیک ہے ول وس پوسیں عباؐس اکبرؐ نال توں  شبیرؐ پر واقف ہیں توں بھینیں دے دل دے حال توں  بھینیں کوں اے پھلاں دے وِچ مجبور تن بھلناں تاں نہیں  ……٭…… لکھ وار تیڈے باغ وِچ آوے بہاراں دی سحر لیکن میں جیڑھے حال وِچ ڈِٹھائے تیڈا نیزے تے سر رب دی قسم ہمشیر کوں اے بانکپن بھلناں تاں نہیں  ……٭…… جعفرؐ ہووے آباد ہنڑ جگ تے اے ملکہؐ شام دی  آہدی ہے اَج تائیں لعلؐ کوں، عاشق بھرا دے نام دی  بدلے توں گھن، ڈُکھ ویر دا، ابن حسنؐ بھلناں تاں نہیں 
Read more

ھَل مِن نَاصِر یَنصُرُنَا ، ھَل مِن نَاصِر یَنصُرُنَا

-
Image
 یا مولا کریمؐ (نوحہ پاک) {2818} ھَل  مِن  نَاصِر  یَنصُرُنَا ،  ھَل  مِن نَاصِر  یَنصُرُنَا ہے کوئی محافظ ایں ویلے آلِ نبیؐ دے خیمیاں دا ……٭…… اَج میڈی مجبوری ہے خیمے نہیں بچوا سنگدا ظالم ویندن خیمیاں دو نہیں اے فوج ہٹا سنگدا بھینیں رہ گیاں ہن کلھیاں ٹر گیا ہے عباؐس بھرا ھَل مِن نَاصِر یَنصُرُنَا ،  ھَل مِن نَاصِر یَنصُرُنَا ……٭…… کلمہ گو تساں ہو سارے اے وی رسولؐ دیاں دھیاں ہن  بعد عباؐس تے اکبرؐ دے اے کلھیاں رہ گیاں ہن  نجف اِچ کوئی اطلاع ڈیوے، بابا خیمے آن بچا ھَل مِن نَاصِر یَنصُرُنَا ،  ھَل مِن نَاصِر یَنصُرُنَا ……٭…… ہے کوئی ایسا ایں ویلے کلمے دا جو پاس کرے  اَج ناموسِ محمدؐ دے پردے دا احساس کرے  ازل دے پردہ داراں تے، ظلم تے جڑ گئی ہے قوم جفا ھَل مِن نَاصِر یَنصُرُنَا ،  ھَل مِن نَاصِر یَنصُرُنَا ……٭…… میں تے بیشک ظلم کرو خیمیاں دو تساں نہ جاؤو پاک رسولؐ دیاں دھیاں دے خیمے چا تساں بچواؤو میکوں بھل ہر درد گیائے روندی ڈیکھ کے عونؐ دی ما ھَل مِن نَاصِر یَنصُرُنَا ،  ھَل مِن نَاصِر یَنصُرُنَا ……٭…… جعفرؐ او مظل...
Read more

خیمیاں دے چارے پاسوں گھوڑے شقی بھجیندن

-
Image
 یا مولا کریمؐ (نوحہ پاک) {1130} خیمیاں دے چارے پاسوں گھوڑے شقی بھجیندن  تطہیر دے اے خیمے بھج بھج ودے ٹھریندن  ……٭…… کمسن جو باہر آندن تھیندا اِنجہ اِحترامے  بے ساختہ زباں تے غازؐی دا آندا نامے  معصوم سارے رو رو اوہلے ودے گولیندن  ……٭…… عصمت دی شاہزادی معصوم ہے گولیندی  زخمی یتیم سارے ہاں نال چا ہے لیندی  کل پردہ دار رل کے عباؐس کوں سڈیندن  ……٭…… خیمیاں دا رنگ ویندائے یکدم حنائی تھیندا  عاؐبد دا پاک خیمہ وِچ دُھوں دے نہیں ڈِسیندا کل پردہ دار باہروں ماتم کھڑے کریندن  ……٭…… خیمے وی ٹھردے پئے ہن نعریاں دی وی صدا ہے  ٹاپاں توں دل لرزدائے گریہ اَتے بکا ہے  سینیں ؐ دے وین آندن شامی ستم وسیندن ……٭…… جعفرؐ حسنؐ دا جاؐنی گھنے انتقام آ کے  سینیں ؐ دے دل آ ٹھارے خود تاج سر سجا کے  خوشیاں سدا ہنڈھاوے، کل رل دعا کریندن  ……٭……
Read more