تیرے سوا کوئی نہیں میرا یہاں جانِ جہاں

 بسم اللہ الرحمن الرحیم 

 یا مولا کریم عجل اللہ فرجک و صلوات اللہ علیک و علیٰ آبائک اجمعین 

﴾جان ِجہاں﴿

19:5:1986

تیرے سوا کوئی نہیں میرا یہاں جانِ جہاں

آنکھیں مری ڈھونڈیں تجھے تو ہے کہاں جانِ جہاں

ہر شام شامِ غم مری ہر صبح آنکھیں نم مری 

چھائی ہیں دل پر درد کی مایوسیاں جانِ جہاں

یہ زندگی ویران ہے ہونٹوں پہ اب تو جان ہے 

آنکھوں میں خیمہ زن ہیں اب تاریکیاں جانِ جہاں

ڈوبی ہے نبض امید کی حسرت ہے صرف اک دید کی 

ہونٹوں پہ ہیں اب موت کی چند ہچکیاں جانِ جہاں

دشوار ہے یہ رہگذر مایوس کن ہے یہ سفر

منزل ہے گم اور کھو گیا ہے کارواں جانِ جہاں

اک لاش ہے یہ زندگی کاندھوں پہ میرے آ پڑی

اب راستوں کا ہو گیا ہے گم نشاں جانِ جہاں

پل بھر سرِ بالیں تو آ دیکھ حال چشم شوق کا 

آنکھوں میں دم ہے منتظر ہونٹوں پہ جاں جانِ جہاں

ہے انتظار اب اس قدر ہر سو بھٹکتی ہے نظر 

ہیں زندگی اور موت سے بیزاریاں جانِ جہاں

اتنی نہ اب تاخیر کر دیدار کی تدبیر کر 

یا موت دے یا ختم کر یہ داستاں جانِ جہاں

جیون بھی شاید چھوڑ دے لب پر دعا دم توڑ دے 

امید کرتی ہے خود کشی ، ہوں نیم جاں جانِ جہاں

جعفر نظر ہے آس ہے طاری دلوں پر یاس ہے 

اب تو دکھا اپنی مسرت کا سماں جانِ جہاں

........٭٭........